فى اوقات كتير و بالذات على صفحات الفيس و تويتر و خصوصا لو بتتكلم فى السياسة تلاقى واحد داخل يقولك ربنا يحشرك مع السيسى علشان انت بتدافع عنه . او ربنا يحشرك مع مرسى علشان انت اخوان . او ربنا يحشرك مع مش عارف مين علشان انت مش عارف ايه .
طبعا احنا عارفين ان اللى بيدعى الدعوة دى قصده انك تتحشر معاه فى جهنم و بئس المصير . سيبك من انك تبع السيسى او تبع الاخوان دى حاجة ترجع لك و انت حر فيها طالما مش بتأذى او بتخرب فدى حرية شخصية ليك .
لكن السؤال اللى المفروض يتسأل هنا : وهو انت ايه اللى عرفك ان اللى انت بتدعى انه يتحشر معاه ده ايا كان هيكون داخل النار ؟؟؟هل أخذ احد منا وعدا من الله ان يدخل هذا الجنة و يدخل ذاك النار على حسب اهواءنا ؟؟هل يدرك فينا احد من سيدخل الجنة و من سيدخل النار ؟؟
ولا اللى بيقول كدة بيكون جايب النتيجة من الكنترول ولا بيشم على ضهر ايده ولا ايه حالته ؟؟
مفيش اى مانع انك تختلف مع شخصية و تكون عايز تولع فيها و لكن ده مش معناه انك تكون انت الصح و مش معناه انك محتكر للدين لدرجة توصلك انك تحكم مين هيدخل الجنة و مين هيترمى فى النار !!!!ولو واحد جه قالى اصله قتل و سرق ومش عارف ايه . فانا احب انى اقوله ما يمكن يتوب و يمكن يعمل حاجات تخليه يتغفر له اللى عمله و يمكن ميكنش عمل حاجة اصلا و يمكن ربنا يعفى عنه .
و بعدين لو احنا بنتكلم من المنطلق ده طب ما فى شخصيات تاريخية كتير قتلت و سرقت و عملت البدع ولكن فى نفس الوقت قدمت خدمات للدين محدش عمل قبلها ولا بعدها . يعنى عندك مثلا قظز قتل اقطاى ظلم . ياترى ربنا هيحاسبه على اللى القتل ولا الانتصار اللى عمله للاسلام و المسلمين ؟؟ و كذلك كل ملوك الدولة العثمانية نفس الحال . و كذلك اوردغان لما الشرطة قتلت عنده محتجين تكسيم يا ترى ربنا هيحاسبه على الخير اللى عمله ولا على الشر ؟؟
بالله عليكم فلتذهب مذاهبكم السياسية كلها الى الجحيم و بلا رجعة و لكن لا تدخلوا الدين فى مثل هذه المهاترات . لم تعد صورة الدين تحتمل تشويه اكثر من ذلك يكفى ما حدث و ما يحدث باسم الدين . وان كان احد فينا يعرف من يدخل الجنة و من يدخل النار فلينبأ نفسه بحال نفسه اولا و يتركه من احوال غيره .
زلزال الكهرباء عمل عملته و رجع ليضرب مصر من جديد اليوم لينهى مسلسل العسل الذى استمر اسبوع كامل بين الكهرباء و المواطنين الا فى احيان قليلة كانت تستمر فيها الكهرباء فى تقديم فصولها البايخة .
مأساة بكل ما تحمل الكلمة من معنى حدثت اليوم حيث انهارت شبكة الكهرباء المصرية لتفقد ربع اجمالى انتاجها بسبب حدوث عطل فنى ادى الى خروج المحطات تباعا من الخدمة . العطل الذى استمر 7 ساعات كاملة و ادى الى زيادة الاحمال بشكل كبير. و النتيجة كانت كارثية و تمثلت فى قطع الكهرباء عن المترو و تعطليه و عن المستشفيات و عن معظم المصالح الحكومية الامر الذى اصاب حياة المواطنين بالشلل التام طيلة اليوم الاربعاء .
الازمة لم تكن فى انقطاع الكهرباء فحسب بل كانت فى تصريحات الوزير المتضاربة الذى استبعد فى البداية وجود شبهة تخريبية و قال انه عطل فنى نادر ثم عاد و قال ان الاخوان من فعلها بأعمال تخريبية .ثم يعود و يقول انه قام بفتح تحقيق لمعرفة المسؤل و محاسبته .
تصريحات متضاربة تدل على حالة الارتباك التى تعيشها الوزارة فهى فى كل مرة تتفنن فى ايجاد مبررات لأزمتها المستعصية بحيث ترمى الاتهام مرة على الاخوان ومرة على وزارة البترول ومرة على الاحمال .
معالى الوزير لو كانت الازمة عندك فى الاخوان فسيادتك تقدر تكشفهم و تحاسبهم شرط وجود دليل مادى وقوى يثبت تورطهم و انهم سبب الازمة و لحين حدوث ذلك فلا تلقى بالتهم على احد .ولو كان الازمة فى البترول فوزارة البترول سبق و اعلنت انها غطت كل احتياجات المحطات من البترول بعد توجيهات الرئيس السيسى و بالتالى حدث هذا التغير النوعى طول الاسبوع الماضى .
اما اذا كانت الازمة فى زيادة الاحمال . فوزارتك يا معالى الوزير هى فقط من تتحمل مسؤلية سوء التخطيط و ليس المواطنين .
معالى الوزير فى اعتقادى انك مطالب قبل اى شيئ بمصارحة و مكاشفة نفسك اولا لتعرف حينها اين الازمة و بعد ذلك تستطيع حلها . و ما دون ذلك فهو هراء ....
(زيادة فى أسعار الوقود . و رفع الدعم عن البطاقات التموينية و استبداله ب 15 جنيه لكل فرد فى الشهر . و زيادة فى أسعار الكهرباء . و زيادة متوقعة فى جميع الأسعار )على هذه الأخبار يندب كل المصريين حظهم العسر على ذلك المجهول القادم عليهم . و ما بين شماتة من بعض المعارضين و بين محاولة التبرير على مضد من المؤيدين و لكن يبقى الوضع على ما هو عليه و على المتضرر يخبط راسه فى اجدع حيطة يقابلها .
الحكومة طلعت و قالت معندناش حل تانى عجز الموازنة كبير و مش هيتحل الا بالطريقة دى و كمان اعملوا حسابكم ان الدعم هيترفع تدريجيا على مدار خمس سنين فخدوا بالكم من دلوقتى ادينا عرفناكم .
و الشعب بيقول حرااااااااام طب احنا نعمل ايه و نعوض الزيادة دى منين و احنا مرتباتنا اصلا ممسوح بيها الأرض . لما تبقوا تدونوا حقوقنا الأول ابقوا ارفعوا الدعم براحتكم .
و الاخوان بيقولوا احسن تستاهلوا كل اللى بيجرى فيكم علشان تبقوا ترقصوا كويس . ابقوا خلوا بشرة خير تنفعكم .
و المؤيدين للقرارات دى رغم قلتهم بيقولوا لازم نصبر بلاش تشمتوا الاخوان فينا و بعدين هى الحكومة هتعمل لنا ايه يعنى و لازم كل الاصلاح تكون بدايته صعبة .
سبونا يا جماعة من كل الكلام ده . و خلونا نعترف ان الوضع غاية فى الصعوبة و لكن ليه الناس العاديين بس اللى المفروض يدفعوا التمن كل مرة . يعنى مثلا واحد مرتبه 800 او 1000 جنيه (يعنى اصلا مش لاقى ياكل عيش حاف) هيقدر على الزيادة المتوقعة دى ازاى ما هو برده اذا اردت ان تطاع فأمر بما يستطاع . المفروض ان فى حاجات تانية تدعم الناس علشان تقدر تواجه الزيادة دى . يعنى مش مرتبات ممسوح بيها الأرض و زيادة فى الكهربا و الأسعار وكمان شبه بتلغى التموين و تقول للناس اهو ده اللى موجود . يبقى انت كدة مش بتقدم حل عملى . المفروض يا جماعة الحكومة تدور على حلول تانية بقى بره الكلام المعتاد ده و متكنش ضحيته الناس الغلابة .
لأن لو استمر الوضع على ما هو عليه فلن نقول سوى اهلا و سهلا بثورة الجياع
(من قتل نفس بغير نفس او فساد فى الأرض فكأنما قتل الناس جميعا ) صدق الله العظيم
الآية دى الأطفال الصغيرة اللى ماشية فى الشارع حفظاها و بتكررها و عارفين معناها كويس لانه مفيش فيه جدل او خلاف .
ولكن يبدو ان صحفى المصرى اليوم(نصار عبد الله) محدش قالها له فعلشان كدة لاقيناه خارج علينا بيعرض التجربة البرازيلية فى حل مشكلة اطفال الشوارع . ايه هو بقى الحل ده؟؟
الحل اننا نعدمهم زى ما بنعدم بالظبط الكلاب الضالة . اصل البرازيل عملت كدة لما كان اقتصادها فى نفس المرحلة اللى بيمر بيها اقتصادنا و ده بيرجع ان تكلفة اعادة تأهيل اطفال الشوارع هتبقى غالية و مكلفة و الاولى اننا نأهل العاطلين و نشغلهم احسن من تأهيل اطفال الشوارع . و كمان قال انه عارف انهم مجنى عليهم مش جناه بس هنعمل ايه بقى البرازيل عملت كدة و البلد محتاجة كدة . و لما هنعمل كدة هنستريح من القلق اللى هما عملينه و معلش بقى تركن حقوق الانسان فى جنب دلوقتى معلش اصل الاقتصاد تعبان .
احب اقوله ملعون ابو الاقتصاد لابو الدولة اللى تعمل فى اهلها كدة ايا كان المبرر و ايا كان السبب و الدولة اللى تقتل 2 مليون طفل لاى سبب كان يبقى سهل عليها تقتل بقية شعبها بأى حجة بعد كدة .وانت لما تفكر انك تعرض مقال تبيح فيه اعدام 2 مليون طفل شوارع بل ما تدور لهم على حل يبقى انت اللى تستاهل الشنق فى ميدان عام .
على فكرة يا جماعة احنا مش بنخترع الذرة من جديد دول كتير من دول العالم اتعرضت لنفس المشكلة بس الشهادة كان عندهم ميزات معينة مش عندنا للاسف . كانوا محظوظين ومكنش عندهم اعلام منافق و متخلف مش بيعرف يعمل حاجة فى الدنيا الا انه يطبل . وكمان كان عندهم عقول محترمة تعرف تفكر فعملت حل جميل جدا انها ضمت الاطفال دول لمؤسسات الجيش و الشرطة و فادتهم و استفادت منهم و دى المبادرة اللى كانت القوات المسلحة طرحتها و نتمنى فعلا انها تنفذها .اما بقى بالنسبة لعديم الضمير صاحب المقال فلازم النقابة يكون لديها دور فى الحوار ده لان الاعلام اللى يأخر ميقدمش و اللى يهد ميبنيش ملوش اى لازمة .
اعتقد ان الاشكال اللى فى صورة دى مش غريبة على حد فينا . كل يوم بنشوفها و كل يوم بنتعامل معاها منها اللى بنتعاطف معاه و منها اللى بنبعد عنه .و لكن بيفضل وجودهم و التعامل معاهم امر واقع فى المجتمع .
و لو انت عايز تعرف صورتهم لما يكبروا فمش مستاهلة انك تتعب خيالك اصل هما دول البلطجية اللى مبوظين البلد دلوقتى و مضيعيين حقوق الناس . هما دول بقى الطرف التالت اللى بيحكوا عنه .
بس قبل ما تشتمهم و تقول انهم يستاهلوا الحرق تعالى و فكر كدة بهدوء فى الظروف اللى وصلتهم لكدة . يا ترى هما اللى اختاروا مصيرهم ده ولا هو اتفرض عليهم
؟؟
علشان منطولش عليكم الناس دى اتولدت ومنهم اللى ميعرفش ليه اهل و لا عيلة ولا بيت . الناس دى كانت بتنام تحت الكبارى و بهدوم صيفى فى عز السقعة ومحدش كان بيسأل فيهم . الناس دى لما كانت اطفال لا اتعلموا و لا عرفوا معنى الدين ولا عرفوا معنى الاخلاق اصل محدش علمهم اصلا يعنى العيب مش فيهم . العالم دى لما كانت بتجوع و الجوع يقرص عليها كانت بتروح تاكل من الزبالة مع القطط و الكلاب . بالله عليكم يا مجتمع ظالم عايزهم يبقوا ايه لما يكبروا علماء وفنانين ولا رجال دين ينشروا العلم بين الناس . قولوا لى احنا بنضحك على مين ؟؟؟؟؟؟
يعنى احنا معرفنهمش معنى البيت و الاهل و الامان و الاستقرار و برده لا علمانهم ولا عرفناهم معنى الدين . ولما سقعوا سبناهم عريانين ولما جاعوا خلناهم يكلوا زبالة مع القطط و الكلاب . وبعد كدة بنلوم عليهم ليه لما بيكبروا بيبقوا عالة على المجتمع .و لما بيغلطوا بنلمهم فى السجون و بصراحة الجرائم اللى هما بيعملوها فعلا بتكون تستحق . بس هو اصلا مين اللى وصلهم للمرحلة دى من الاساس مش احنا باهمالنا ليهم يبقى ليه بنلوم عليهم دلوقتى ؟؟؟؟
اعتقد اننا قبل ما نحاسبهم لازم الاول نحاسب نفسنا الف مرة على المرحلة اللى وصلناهم ليها .
و للحديث بقية ان شاء الله ....
<
مفيش اى مانع انك تختلف مع شخصية و تكون عايز تولع فيها و لكن ده مش معناه انك تكون انت الصح و مش معناه انك محتكر للدين لدرجة توصلك انك تحكم مين هيدخل الجنة و مين هيترمى فى النار !!!!ولو واحد جه قالى اصله قتل و سرق ومش عارف ايه . فانا احب انى اقوله ما يمكن يتوب و يمكن يعمل حاجات تخليه يتغفر له اللى عمله و يمكن ميكنش عمل حاجة اصلا و يمكن ربنا يعفى عنه . 
