عيد الحب وربنا ما يقطع لكم عادة !!!!!

طبعا النهاردة 14 فبراير الموافق عيد الحب . ومش عيد الحب و بس لا ده كمان عيد الهرى و الفراغ القاتل . يعنى مثلا و من قبل يوم 14 بكام يوم تلاقى ان الحفلة بدأت و تلاقى اللى يعمل نفسه نحنوح ومقضيها بوستات عاطفية . و اللى يعمل نفسه زاهد فى الدنيا و ان الكلام ده ميفرقش معاه . و اللى قاعد مستنى الفرج من عند ربنا . و اللى قاعد يقول عيد الحب اصلا حرام . و اللى مقضيها اشتغالات فى صحابه و انواع تانية كتير .
بس لو جينا فكرنا هنلاقى ان الحب اكبر من الهرى ده كله اصل الحب مش انك تمشى مع واحدة يومين و تقضوها حب و دباديب و تسيبوا بعض بعد يومين و الحب فى حد ذاته عمره ما كان حرام ولكن ممكن اللى بيترتب على الحب من الناس اللى نفوسها ضعيفة هو اللى حرام . برده الحب عمره ما كان هيافة .بالعكس الحب ده شيئ جميل جدا و كفيل انه يغير حياة اى شخص 180 درجة لو استخدمناه صح . و الحب ان الطرفين يحافظوا على بعض و يكون هدفهم انهم يطوروا بعض و يكون حبهم سبب سعادتهم و لازم يحطوا حدود لحبهم مش يتخطوها لغاية ما ربنا يتم عليهم نعمته فى الحلال وعلشان ربنا يبارك لهم . اللى بيحب بجد عمره ما بيخون ولا بيبيع و لا بيفرط فى حبيبه ولا بيأذيه بالعكس ده بيحافظ عليه اكتر من نفسه . علشان هو عارف انه كل ما راعى ربنا فيه كل ما ربنا هيقرب السكة بينهم.و ربنا ما يقطع لكم عادة :D

<>