جيل الثورة

الفخر كل الفخر لذلك الجيل . ذلك الجيل الذى كسر كل قيود الخوف و الذل والامتهان . لكل فرد فى ذلك الجيل افتخر فأنت قلت لأكبر طغاة عرفهم التاريخ لا و ألف لا . افتخر فأنت عملت اللى كل جدودك و اباءك حاولوا يعملوه ولكن ديما حاجز الخوف كان بيمنعهم . أفتخر فأنت نزلت فى كل ميادين بلدك وقلت لأكبر نظام طاغى عرفه التاريخ ارحل . ولما جرب النظام ده يعاندك وقال عنك انك جيل تافه نزلت فى كل حتة فى البلد وقلت له مش هتبات فيها ولأنه نظام قد اصابه العجز والوهن مقدرش يقف قدام جبروت قوة عزيمتك وشبابك . قبل كدة كنا بنصبر بس مكناش عارفين اخرة الصبر ده ايه بس دلوقتى احنا بنصبر واحنا عارفين ان فيه امل فينا . انت جيل قدمت الاف الشهداء والمصابين علشان تقول انا حر . فى عز ما كنت تايه فى تعليم فاسد و بطالة و كل العوامل اللى تخليك اسوء جيل عرفته تلك الامة قلت لا ده انا الجيل الوحيد اللى اعرف اجيب حقى و اقول بعلو صوتى انا حر . انت الصخرة اللى اتولد عليها الامل فى نفس كل واحد من شعب فضل طول عمره مكسور. مش تيأس من الظروف اللى البلد بتمر بيها البلد دلوقتى ومش تسمع كلام اى جبان يقولك الثورة اللى انت عملتوها هى بوظت الدنيا قل له بعلو صوتك هى اصلا كانت بايظة بس انا وجيلى اللى رسمنا ملامح الامل . قل له انا و جيلى لما اتجمعنا مع بعض خلينا العالم كله يحترمنا و لما خلينا جيلكم يمسك زمام الامور هو اللى عايز يغرقنا . قل له ان البلد دى مش هتضيع طول ما احنا فيها . قله انا و جيلى اللى خلينا للبلد دى حاجة مشرفة وسط العالم و جيلكم جه يدور على مصلحته و كراسى الحكم وبيغرقنا تانى بس احنا مش هنسمح له . قل له ان الثورة دى هتكون واقع و مش هتبقى مجرد حكاية نحكيها .
خليك واثق فى نفسك و اعرف ان الله لا يضيع اجر من احسن عملا . ارف راسك فوق فأنت حر