رسالة لكل اخوانى

فى البداية انا مش هلومك على انتماءك لأن دى حرية شخصية ليك وانا ملييش انى اناقشك فيها . و برده مش هلومك انك قبل 30 يونيو كنت بتعترف عيانا بيانا ان حكم الاخوان حكم مهزوز ولا يليق و بعد 30 يونيو قلت ان الأخوان عملوا انجازات خرافية فى الفترة اللى قعدوها مش هلومك لانك حتى ولو كنت كذاب فأنت حر فى وجهة نظرك . 
بس اسمح لى الومك على حالك اللى انت وصلت ليه . اسمح لى الومك على عنادك و غرورك اللى مانعك انك تعترف بخطأك . خطأك اللى انت لو كنت اعترفت من الأول بيه مكنش كل اللى حصل ده حصل .
على فكرة انا مش ضدك لانك فى الاول وفى الاخر حتى ولو اختلفت معاك فى الرأى فأنت اخويا و اختى و ابويا و امى و جارى و قريبى و قبل كل ده انت ابن بلدى . 
بس اسمح لى اسأل شوية اسئلة و ياريتك لو تفكر فى كلامى ولو لدقيقة واحدة .
أنت ماشى ورا كلام قياداتك اللى رافضة المصالحة و بتعتبر ان اللى حصل ده انقلاب وان لا مصالحة مع الانقلاب  طب تمام .
اولا انا مش هتناقش معاك هو انقلاب ولا ثورة لأن ده مش يهمنى .بس هتناقش معاك فى الطريقة اللى انت بتتعامل بيها مع اللى انت بتسميه انقلاب لان ده اللى يهمنى . 
انت بتواجه الدولة بالمظاهرات اللى انت بتعملها و اللى بيكون الشباب هو اللى ماشى فيها .طب تمام برده مخلتفناش بس ابسط حاجة بتعملها الحكومة هى انها بتوقف لك الأمن .فالأمن بينزل بشكل هستيرى يلم اللى يقدر عليه من مظاهراتك و يرميهم فى المعتقل و تفضل النيابة تجدد لهم و طبعا كلنا عارفين ان اللى بيدخل مفقود و اللى بيخرج مولود ده لو خرج حد اصلا .طبعا و الموضوع ده مش حصل مرة ولا اتنين لا ده حصل كتير جدا لغاية ما المعتقلات مبقتش تساعى الاعداد اللى داخلة فيها . 
السؤال هنا بقى أنت استفدت ايه ؟. و بلاش الكلمتين بقى بتوع أصل المظاهرات هى السلاح ضد الانقلاب و الكلام ده كله لأن انا عارف وانت عارف ان شعبية قادة الجيش فى زيادة يوم بعد يوم و شعبيتك للاسف بتقل يوم بعد اليوم وحتى لو كسبت تعاطف الناس فى الفترة الحالية من الظلم اللى بيقع عليك الا ان الناس برده مش قادرة تسامحك على غلطاتك لحد دلوقتى .
انت بتستفاد ايه لما بتخسر شبابك يوم عن التانى؟ .بتستفاد ايه لما كل يوم يتقتل او يعتقل منك او من التانيين؟ .قولى ايه وجهة الفايدة اللى وقعت عليك او على البلد غير ان الظالم ازداد ظلم لان مش لاقى حد يقف فى وشه . ايه وجه الفايدة انك قلبت الجامعات ساحات سياسية وكان بسبب مظاهراتك اللى جوه الجامعة الأمن دخل الجامعة و اعتقل ناس كتير ظلم لمجرد ان الكاميرات لقطتها و هى ماشية جنب مظاهرتك . ايه الفايدة من المظاهرات دى غير ان الناس بتزداد حقد عليك . ايه الفايدة من  القلق ده كله . انت فاكر انك كدة بتهد الحكومة احب اقولك انسى لانها لو كان اتهدت مكنتش خرجت قاون التظاهر القمعى فى كتير من الاحوال ومكنتش خرجت احكام ظالمة زى الاحكام اللى خرجت على البنات اللى اتحكم عليهم ب 11 سنة و طلبة الازهر اللى اتحكم عليهم ب 17 سنة . هتقولى مثلا ان الاحكام دى بداية انهيارهم و الكلام ده كله طب ماشى . ولو افرض مش انهاروا يبقى انت الخسران و ضيعت شباب فى عمر الزهور اونطة ومن غير اى مقابل .صدقنى هنفضل نلف نلف و فى الاخر هيكون الحل هو المصالحة و أكبر دليل على كلامى الجماعات الاسلامية فضلت تقتل و تتوعد و كانت اكتر منك تشدد و عناد بس الأمر انتهى بيهم الى المصالحة برده .صدقنى قياداتك بترميك للتهلكة علشان مصالحهم او مصالح الجماعة و فى الاخر برده جماعتك هتتصالح لأن الانتخابات على الابواب وهى كالعادة بتسعى لمصالحها و هتحاول بشتى الطرق انها ترجع نفسها تانى للسياسة و هتكون انت كبش الفدا للى بيحص دلوقتى و هما كدة كدة مش خسارنين حاجة حتى المحبوسين منهم كل يوم منظمات حقوق الانسان تروح تشوف احوالهم و الاعلام مركز عليهم ومحدش بيقدر يمس شعرة منهم انما انت لما بتروح محدش بيقولك انت ابن مين . و اللى هرب منهم عايش حياته بالطول و العرض و عايش احسن عيشة بره زى عاصم عبد الماجد و خالد عبد الله فى قطر . صدقنى لو ركزت فى كلامى هتلاقى كلامى هو اللى بيحصل . انا مش بقولك انشق عنهم لأن دى حاجة ترجع لك بس على الأقل فكر فى نفسك وفى حياتك و دافع عن حقك بس دافع عنه بعقل و بلاش ترمى نفسك فى سكة اللى يروح مش بيرجع .