طول ما النوعية دى موجودة يبقى احنا لسه فينا الخير

الموضوع ده لما قرأته على احدى الصفحات على الفيس بوك تأكدت ان الحديث الشريف اللى بيقول فيه الرسول صلى الله عليه وسلم ان الخير فى و فى امتى الى يوم الدين . هو حديث يمثل حقيقة واقعية . وتأكدت كمان ان طول ما احنا لسه فينا نوعية زى الشاب اللى فى الموقف ده طول ما هيفضل الخير فينا.
الموقف بتحكيه واحدة من اللى كان فى المكان . و الموقف هو :

ان فى واحد من المطاهم الشهيرة فى مصر الجديدة دخل طفل كان لابس هدوم وسخة و راح للراجل بتاع الكاشير و قاله لو سمحت يا عمو انا عايز شوية بطاطس لانى جعان . فقام الراجل بتاع الكاشير زعق له جامد وطرده بره المحل . فالولد سحب نفسه بكل هدوء و الدموع مالية عينه وقعد على الرصيد اللى قدام المحل يعيط . فواحد من الشباب اللى كانوا بيشتروا سندوتشات فضل باصص للولد بعد ما خرج و شوية وقام خارج بره المحل ودخل تانى وفى ايده الولد و ادى له القايمة و قاله اختار اى سندوتش على مزاجك و لارج كمان . الولد قاله انا بس عايز شوية بطاطس علشان انا جعان . فالشاب رد عليه و قاله لا اطلب اى سندوتش على مزاجك وبعد ما الولد طلب السندوتش قام الشاب جاب له البطاطس و كمان بيبسى وعمل حركة جميلة جدا هى انه قعد الولد معزز ومكرم فى الطرابيزة اللى فى وش الكاشير اللى زعق للولد . الولد عيط بس المرة دى من الفرحة ان كرامته رجعت وانه هياكل اللى هو عايزه . والناس كلها كانت مبسوطة من الموقف اللى عمله الشاب . وعلى فكرة البنت اللى كتبت الموقف ده على صفحتها سألت الشاب عن اسمه بس هو رفض انه يقوله وقال انه من الافضل ان الناس تدعى ان ربنا يتقبل الموقف ده .
الموقف ده بالنسبة ليا كان ليه معانى كتير بجد . اهمها اننا لسه فينا الخير و ان مهما الدنيا اتغيرت هيفضل الخير بذرة جوانا عمرها ما تفسد . واننا بجد لازم ندور ونسعى اننا نساعد كل اللى حوالينا علشان ربنا يحط فى طريقنا اللى يساعدنا و يخرجنا من اى محنة نقع فيها .